ໂດຍຫົວຂໍ້ແມ່ນ “ບັນດາລັດຖະສະພາແມ່ນພື້ນຖານເພື່ອເພີ່ມທະວີການສຶກສາເພື່ອສັນຕິພາບ, ຄວາມສະຫງົບ ແລະ ນິຕິບັນຍັດ ”, ຕອນເຊົ້າວັນທີ 7 ເມສາ 2019, ທີ່ນະຄອນຫຼວງ ໂດຮາ, ປະເທດ ກາຕາ, ກອງປະຊຸມສະມັດຊາໃຫຍ່ຄັ້ງທີ 140 ສະຫະພັນລັດຖະສະພາສາກົນ (IPU-140) ໄດ້ ດຳເນີນວາລະປະຊຸມຄົບຄະນະ. ທ່ານນາງປະທານສະພາແຫ່ງຊາດ ຫງວຽນທິກິມເງິນ ມີບົດກ່າວປາໄສທີ່ວາລະປະຊຸມດັ່ງກ່າວ.
ທ່ານນາງປະທານສະພາແຫ່ງຊາດ ຫງວຽນທິກິມເງິນ ກ່າວວ່າ ໃນວິວັດທະນາການພັດທະນາປະເທດຊາດ, ເຊື່ອມໂຍງເຂົ້າກັບສາກົນຂອງຕົນ, ຍາມໃດ ຫວຽດນາມ ກໍ່ໃຫ້ບູລິມະສິດແກ່ການພັດທະນາ ໄປພ້ອມກັບຄວາມໝັ້ນຄົງ, ຍົກສູງການສຶກສາແມ່ນລັດຖະນະໂຍ ບາຍແຖວໜ້າ, ປະກອບສ່ວນຍົກສູງຄວາມຮັບຮູ້ຂອງປະຊາຊົນ, ສ້າງແຫຼ່ງຊັບພະຍາກອນທີ່ມີລະດັບສູງເພື່ອຕອບສະໜອງຄວາມຮຽກຮ້ອງໃນຍຸກສະໄໝເຕັກໂນໂລຊີ 4.0.
ຕາມການລາຍງານຂອງທະນາຄານໂລກ, ປີ 2018 ມີ 7/10 ລະບົບການສຶກສາແຖວໜ້າຂອງໂລກນອນຢູ່ໃນຂົງເຂດອາຊີຕາເວັນອອກ-ປາຊີຟິກ. ຫວຽດນາມ ໄດ້ຮັບການຕີລາຄາແມ່ນໜຶ່ງໃນບັນດາລະບົບການສຶກສາພັດທະນາ. ຄຽງຄູ່ກັນນັ້ນ, ການກໍ່ສ້າງອາຊີບ ກໍ່ໄດ້ ຫວຽດນາມ ຖືເປັນສິ່ງສຳຄັນ, ປະສານສົມທົບກັບສາມັນສຶກສາ ແລະ ມະຫາວິທະຍາໄລ ເພື່ອປະກອບເພີ່ມເຕີມກຳລັງນັກວິສາວະກອນ ດ້ານວິທະຍາສາດພື້ນຖານ ແລະ ເຕັກນິກເຕັກໂນໂລຊີ. ສະພາແຫ່ງຊາດ ຫວຽດນາມ ໄດ້ອະນຸມັດຜ່ານ ແລະ ດັດແປງຂໍ້ມູນເອກະສານກົດໝາຍທີ່ສຳຄັນຫຼາຍສະບັບຄື: ລັດຖະທຳມະນູນ, ກົດໝາຍວ່າດ້ວຍການສຶກສາຊັ້ນມະຫາວິທະຍາໄລ, ກົດໝາຍວ່າດ້ວຍການສຶກສາ ອາຊີບ ແລະ ເພີ່ມທະວີການຄວບຄຸມກວດກາ ເພື່ອຍົກສູງຄຸນນະພາບ ການປ່ຽນແປງໃໝ່ ຂອງການສຶກສາຢູ່ ຫວຽດນາມ, ປັດຈຸບັນ ພວມປະຕິບັດການດັດແປງກົດໝາຍວ່າດ້ວຍການສຶກສາ ດ້ວຍເປົ້າໝາຍກໍ່ສ້າງພື້ນຖານການສຶກສາ ພັດທະນາຢ່າງຮອບດ້ານ ທັງຄຸນນະພາບ ແລະ ຄວາມສາມາດ, ເສີມຂະຫຍາຍຄວາມສາມາດຂອງນັກຮຽນ ຫວຽດນາມ ແຕ່ລະຄົນໃຫ້ດີທີ່ສຸດ.
ເພື່ອເພີ່ມທະວີບົດບາດຂອງສະພາແຫ່ງຊາດໃນການຊຸກຍູ້ການສຶກສາເພື່ອສັນຕິພາບ, ຄວາມສະຫງົບ ແລະ ນິຕິບັນຍັດ, ທ່ານນາງປະທານສະພາແຫ່ງຊາດ ໄດ້ສະເໜີອອກເນື້ອໃນຈຳນວນໜຶ່ງ. ກ່ອນອື່ນໝົດ, ປະຊາຄົມສາກົນຕ້ອງສືບຕໍ່ປັບປຸງສະພາບແວດລ້ອມສັນຕິພາບ, ສະຖຽນລະພາບໃຫ້ແກ່ການພັດທະນາແບບຍືນຍົງຄົງຕົວ, ຖືສຳຄັນການສຶກສາຢ່າງຮອບດ້ານໃຫ້ແກ່ປະຊາຊົນ; ຍູ້ແຍງການສຶກສາ ອາຊີບ ເພື່ອຍົກສູງຄຸນນະພາບແຮງງານ, ຮັບໃຊ້ໃຫ້ແກ່ການພັດທະນາເສດຖະກິດ. ພ້ອມກັນນັ້ນ, ຕ້ອງເສີມຂະຫຍາຍບົດບາດຂອງບັນດາລັດຖະສະພາ, ຜູ້ແທນລາຊະດອນ, ສຳເລັດການກໍ່ສ້າງກອບນິຕິກຳຢູ່ພາຍໃນ, ກໍ່ສ້າງລັດນິຕິບັນຍັດ, ຄວບຄຸມກວດກາການປະຕິບັດ ແລະ ໃຫ້ສັດຕະຍະບັນ ງົບປະມານ ທີ່ເໝາະສົມກັບບັນດາແຜນການປະຕິຮູບ, ປ່ຽນແປງໃໝ່ການສຶກສາ ແລະ ບຳລຸງສ້າງແບບຍືນຍົງຄົງຕົວ; ພ້ອມນັ້ນ ຮັບປະກັນການປະຕິບັດຄວາມຍຸຕິທຳ, ສະເໝີພາບລະຫວ່າງທຸກພາກສ່ວນໃນສັງຄົມ, ບໍ່ຈຳແນກແຕກຕ່າງໃນການປະພຶດ ຫຼື ປະພຶດແບບບໍ່ສະເໝີພາບ ເພື່ອໃຫ້ປະຊາຊົນໝົດທຸກຄົນ ໄດ້ເຂົ້າໃກ້ກັບການສຶກສາ.
ຊຸກຍູ້ການພົວພັນກັບລັດຖະສະພາ ເອີຣົບ
ການຢ້ຽມຢາມ ແລະ ເຮັດວຽກກັບລັດຖະສະພາ ເອີຣົບ ຂອງທ່ານນາງປະທານສະພາແຫ່ງຊາດ ຫງວຽນທິກິມເງິນ ຄັ້ງນີ້ ແນໃສ່ການ ແລກປ່ຽນກ່ຽວກັບການພົວພັນຮ່ວມມື ລັດຖະສະພາ ລະຫວ່າງ ສະພາແຫ່ງຊາດ ຫວຽດນາມ ກັບລັດຖະສະພາ ບັນດາປະເທດ ສະມາຊິກຂອງສະຫະພາບ ເອີຣົບ, ລັດຖະສະພາ ເອີຣົບ, ຊຸກຍູ້ການພົວພັນລະຫວ່າງ ອາຊຽນ ກັບສະຫະພາບ ເອີຣົບ... ແລະ ແລກປ່ຽນກ່ຽວກັບບັນດາບັນຫາ ທີ່ສອງຝ່າຍ, ພາກພື້ນ ແລະ ສາກົນ ພວມມີຄວາມສົນໃຈ.
ວັນທີ 28 ພະຈິກ 1990, ຫວຽດນາມ ແລະ ສະຫະພາບ ເອີຣົບ ສ້າງຕັ້ງການພົວພັນທາງດ້ານການທູດຢ່າງເປັນທາງການ. ປີ 1996, ສະຫະພາບ ເອີຣົບ ໄດ້ເປີດຫ້ອງການຜູ້ຕາງໜ້າຂອງຄະນະກຳມະການ ເອີຣົບ (EC) ຢູ່ ຮ່າໂນ້ຍ. ສອງຝ່າຍໄດ້ຮັກສາບັນດາກົນໄກວ່າດ້ວຍການຮ່ວມມື: ປຶກສາ ແລະ ຟັງຄວາມຄິດຄວາມເຫັນດ້ານການເມືອງ ຊັ້ນຮອງນາຍົກລັດຖະມົນຕີການຕ່າງປະເທດ ເປັນປະຈຳ; ຄະນະກຳມະການປະສົມ ຫວຽດນາມ-ສະຫະພາບ ເອີຣົບ: ກົນໄກສົນທະນາກ່ຽນກັວສິດທິມະນຸດ ຫວຽດນາມ-ສະຫະພາບ ເອີຣົບ ແລະ ອື່ນໆ.
ຫວຽດນາມ ແລະ ສະຫະພາບ ເອີຣົບ ໄດ້ມີການສົມທົບກັນທີ່ບັນດາເວທີຫຼາຍຝ່າຍ, ອົງການຈັດຕັ້ງສາກົນ, ພິເສດແມ່ນໃນກອບຂອງການຮ່ວມມືລະຫວ່າງ ອາຊຽນ-ສະຫະພາບ ເອີຣົບ, ອາແຊມ ແລະ ສະຫະປະຊາຊາດ, ໃນການແກ້ໄຂບັນດາບັນຫາ ໂລກ ຄື: ການປ່ຽນແປງຂອງດິນຟ້າອາກາດ, ພັດທະນາຢ່າງຍືນຍົງຄົງຕົວ, ຄວາມສະຫງົບພະລັງງານ, ຕ້ານການກໍ່ການຮ້າຍ, ຕ້ານການເຜີຍແຜ່ອາວຸດທຳລາຍລ້າງ, ການຍົກຍ້າຍຜິດກົດໝາຍ ແລະ ອື່ນໆ.
ປີ 2017, ສະຫະພາບ ເອີຣົບ ເປັນຄູ່ຮ່ວມມືການຄ້າອັນດັບ 3 (ຫຼັງຈາກ ຈີນ ແລະ ສ ອາເມລິກາ) ແລະ ເປັນຕະຫຼາດສົ່ງອອກອັນດັບ 2 ( ຫຼັງຈາກ ສ ອາເມລິກາ) ຂອງ ຫວຽດນາມ. ບັນດາປະເທດຄື: ເຢຍລະມັນ, ອັງກິດ, ໂຮນລັງ, ອິຕາລີ, ຝຣັ່ງ, ແອັສະປາຍ, ໂອຕຣິດ ແລະ ແບບຊິກ ເປັນຕະຫຼາດ 8 ແຫ່ງໃຫຍ່ທີ່ສຸດ ຂຶ້ນກັບສະຫະພາບ ເອີຣົບ ໄດ້ນຳເຂົ້າສິນຄ້າຂອງ ຫວຽດນາມ, ແຕ່ລະປີ ບັນລຸໄດ້ມູນຄ່າກວ່າ 1 ຕື້ໂດລາສະຫະລັດ. ສິນຄ້າສົ່ງອອກຂອງ ຫວຽດນາມ ສ່ວນຫຼາຍແມ່ນຜະລິດຕະພັນຕຳ່ແຜ່ນຕັດຫຍິບ, ເກີບ,ກາເຟ, ເຄື່ອງທະເລ, ຄອມຜິວເຕີ ແລະ ອື່ນໆ. ສອງຝ່າຍໄດ້ສຳເລັດການເຈລະຈາສັນຍາການຄ້າເສລີ ຫວຽດນາມ-ສະຫະພາບ ເອີຣົບ (EVFTA).
ການພົວພັນລະຫວ່າງສະພາແຫ່ງຊາດ ຫວຽດນາມ ແລະ ລັດຖະສະພາ ເອີຣົບ ໄດ້ຮັບການຊຸກຍູ້ ແລະ ພັດທະນາຢ່າງບໍ່ຢຸດຢັ້ງ, ກາຍເປັນເສົາຄຳ້ທີ່ສຳຄັນໃນການພົວພັນຮ່ວມມືຢ່າງຮອບດ້ານ ລະຫວ່າງ ຫວຽດນາມ-ສະຫະພາບ ເອີຣົບ. ບັນດາການເຄື່ອນໄຫວແລກປ່ຽນຄະນະຜູ້ແທນໄຂຂຶ້ນຢ່າງເລື້ອຍໆ ແລະ ການພົບປະສົນທະນາເປັນປະຈຳ ລະຫວ່າງ ບັນດາຜູ້ແທນລາດຊະດອນ ທີ່ເວທີລັດຖະສະພາຫຼາຍຝ່າຍ ໄດ້ປະກອບສ່ວນຢ່າງຂັນແຂງໃຫ້ແກ່ການພົວພັນມິດຕະພາບ, ຮ່ວມມືລະຫວ່າງ ຫວຽດນາມ ແລະ ສະຫະພາບ ເອີຣົບ ເວົ້າລວມ ແລະ ໂດຍສະເພາະແມ່ນການພົວພັນຂອງລັດຖະສະພາ. ສອງຝ່າຍໄດ້ສ້າງຕັ້ງກຸ່ມຜູ້ແທນລາດຊະດອນ ມິດຕະພາບ ສອງຝ່າຍ.
ພາເຮັດໃຫ້ສາຍພົວພັນຄູ່ຮ່ວມມືຍຸດທະສາດ ຫວຽດນາມ-ຝຣັ່ງ ເຂົ້າໄປສູ່ລວງເລິກ ແລະ ມີເນື້ອແທ້
ການຢ້ຽມຢາມຄັ້ງນີ້ ແມ່ນມີຄວາມໝາຍສຳຄັນ ເພື່ອແນໃສ່ປັບປຸງ ແລະ ເພີ່ມທະວີການພົວພັນຄູ່ຮ່ວມມືຍຸດທະສາດກັບ ຝຣັ່ງ, ຜັນຂະຫຍາຍໝາກຜົນການຢ້ຽມຢາມ ຝຣັ່ງ ຂອງທ່ານເລຂາທິການໃຫຍ່ ຫງວຽນຝູ໋ຈ້ອງ ແລະ ຫັນຖະແຫຼງການຮ່ວມລະຫວ່າງການນຳຂັ້ນສູງສອງປະເທດກ່ຽວກັບການຮ່ວມມືລະຫວ່າງລັດຖະສະພາໃຫ້ປະກົດຜົນເປັນຈິງ.
ສາຍພົວພັນທາງດ້ານການເມືອງອັນດີງາມ ລະຫວ່າງ ສອງປະເທດໄດ້ສ້າງຂີດໝາຍຜ່ານບັນດາການຢ້ຽມຢາມຂັ້ນສູງ, ມໍ່ໆ ນີ້ ແມ່ນການຢ້ຽມຢາມ ຫວຽດນາມ ຂອງປະທານາທິບໍດີ ຝຣັ່ງ François Hollande ເມື່ອປີ 2016 ແລະ ການຢ້ຽມຢາມ ຝຣັ່ງ ຂອງທ່ານເລຂາທິການໃຫຍ່ ຫງວຽນຝູ໋ຈ້ອງ ເມື່ອເດີອນ ມີນາ 2018. ສອງປະເທດໄດ້ຮັກສາກົນໄກວ່າດ້ວຍການຮ່ວມມືສະບັບ, ພົ້ນເດັ່ນມີສົນທະນາຍຸດທະສາດກ່ຽວກັບຄວາມສະຫງົບດ້ານປ້ອງກັນຊາດ ແລະ ສົນທະນາຂັ້ນສູງກ່ຽວກັບເສດຖະກິດ ຊຶ່ງໄດ້ຈັດຂຶ້ນເປັນປະຈຳ.
ການພົວພັນຮ່ວມມືລັດຖະສະພາລະຫວ່າງສອງປະເທດ ກໍ່ໄດ້ຮັກສາ ແລະ ພັດທະນາຢ່າງຂັນແຂງ. ສອງຝ່າຍມີການແລກປ່ຽນຄະນະຜູ້ແທນ ແລະ ຮ່ວມມືຢູ່ບັນດາເວທີລັດຖະສະພາຫຼາຍຝ່າຍ, ພິເສດແມ່ນສະຫະພັນ ລັດຖະສະພາສາກົນ... ສະພາແຫ່ງຊາດ ຫວຽດນາມ ໄດ້ເຊັນຂໍ້ຕົກລົງວ່າດ້ວຍການຮ່ວມມືກັບສະພາສູງ ແລະ ສະພາຕຳ່ຂອງ ຝຣັ່ງ, ນັ້ນແມ່ນພື້ນຖານເພື່ອຊຸກຍູ້ການພົວພັນຮ່ວມມືກັບລັດຖະສະພາ. ສະພາແຫ່ງຊາດສອງປະເທດ ໄດ້ສ້າງຕັ້ງກຸ່ມຜູ້ແທນລາດຊະດອນ ມິດຕະພາບ ສອງຝ່າຍ.
ການພົວພັນລະຫວ່າງ ຫວຽດນາມ ແລະ ຝຣັ່ງ ພວມພັດທະນາຢ່າງດີງາມ ໃນຫຼາຍຂົງເຂດ. ຝຣັ່ງ ເປັນຄູ່ຮ່ວມມືການຄ້າອັນດັບ 4 ຂອງ ຫວຽດນາມ ຢູ່ ເອີຣົບ, ຫຼັງຈາກ ເຢຍລະມັນ, ອັງກິດ ແລະ ໂຮນລັງ. ມູນຄ່າການຄ້າສອງສົ້ນ ປີ 2018 ບັນລຸໄດ້ 5,1 ຕື້ໂດລາສະຫະລັດ, ເປັນອັນດັບ 3 ໃນຈຳນວນປະເທດ ເອີຣົບ ແລະ ເປັນອັນດັບທີ 16/126 ປະເທດ ແລະ ເຂດແຄວ້ນ ມີການລົງທຶນໂດຍກົງ ເຂົ້າ ຫວຽດນາມ ດ້ວຍຍອດທຶນຂຶ້ນທະບຽນ ບັນລຸໄດ້ເກືອບ 2,8 ຕື້ໂດລາ
ສະຫະລັດ, ເປັນຜູ້ອຸປະຖຳທຶນ ODA ສອງຝ່າຍແຖວໜ້າໃຫ້ແກ່ ຫວຽດນາມ ຢູ່ ເອີຣົບ ດ້ວຍຈຳນວນເງິນ 3 ຕື້ ເອີໂຣ.
ເພີ່ມທະວີການຮ່ວມມືຫຼາຍດ້ານກັບ ມາຣົກ
ການຢ້ຽມຢາມລາຊະອານາຈັກ ມາຣົກ ຂອງທ່ານນາງປະທານສະພາແຫ່ງຊາດ ຫວຽດນາມ ຫງວຽນທິກິມເງິນ ເພື່ອແນໃສ່ເພີ່ມທະວີການພົວພັນມິດຕະພາບ ແລະ ຮ່ວມມືຫຼາຍດ້ານກັບ ມາຣົກ; ໃນນັ້ນຈຸດໜັກແມ່ນຮ່ວມມືດ້ານການຄ້າ-ການລົງທຶນ, ການທ່ອງທ່ຽວ, ທະນາຄານ, ພະລັງງານ, ຮ່ວມມືລະຫວ່າງບັນດາທ້ອງຖິ່ນ, ຮ່ວມມື 3 ຝ່າຍລະຫວ່າງ ຫວຽດນາມ, ມາຣົກ ແລະ ປະເທດໜຶ່ງຢູ່ທະວີບ ອາຟຣິກກາ; ແລກປ່ຽນບັນດາວິທີຊຸກຍູ້ການພົວພັນຮ່ວມມືດ້ານ ລັດຖະສະພາສອງຝ່າຍ ເພື່ອແນໃສ່ຜັນຂະຫຍາຍບັນດາຂໍ້ຕົກລົງຮ່ວມມືທີ່ໄດ້ລົງນາມ ຢ່າງມີປະສິດທິຜົນ.
ຫວຽດນາມ ແລະ ມາຣົກ ໄດ້ສ້າງຕັ້ງສາຍພົວພັນທາງການທູດໃນວັນທີ 27 ມີນາ 1961. ເຖິງວ່າ ສອງປະເທດ ຫວຽດນາມ ແລະ ມາຣົກ ຢູ່ສອງທະວີບທີ່ໄກຈາກກັນ, ແຕ່ການນຳ ແລະ ປະຊາຊົນສອງປະເທດ ຫຼາຍລຸ້ນຄົນ ໄດ້ມີການສ້າງສາ ແລະ ພັດທະນາສາຍພົວພັນລະຫວ່າງສອງປະເທດ ຢ່າງບໍ່ຢຸດຢັ້ງ. ນາຍົກລັດຖະມົນຕີ ແລະ ປະທານສະພາແຫ່ງຊາດ ສອງປະເທດ ໄດ້ມີການຢ້ຽມຢາມເຊິ່ງກັນ ແລະ ກັນ, ສອງປະເທດມີການແລກປ່ຽນຄະນະຜູ້ແທນ ຂັ້ນລັດຖະມົນຕີ ຢ່າງເລື້ອຍໆ. ການພົວພັນທາງການທູດສອງຝ່າຍຢູ່ລະດັບສູງທີ່ສຸດ. ປັດຈຸບັນ, ການພົວພັນລະຫວ່າງສອງປະເທດ ພວມພັດທະນາເປັນຢ່າງດີ. ສອງຝ່າຍມີການສົມທົບ ແລະ ສະໜັບສະໜູນ ເຊິ່ງກັນ ແລະ ກັນ ບົນເວທີສາກົນ. ເດືອນ ທັນວາ 2014, ມາຣົກ ຮັບຮອງ ຫວຽດນາມ ເປັນປະເທດມີພື້ນຖານເສດຖະກິດການຕະຫຼາດຄົບຖ້ວນ.
ມາຣົກ ເປັນຕະຫຼາດມີພື້ນຖານຄວາມສະຫງົບທາງການເມືອງ ແລະ ສັງຄົມ ທີ່ໝັ້ນຄົງອັນດັບໜຶ່ງໃນຂົງເຂດທະວີບ ອາຟຣິກກາ. ດ້ວຍພູມີປະເທດທີ່ສະດວກ, ມາຣົກ ສາມາດກາຍເປັນ “ປະຕູຮົ້ວ” ເພື່ອໃຫ້ສິນຄ້າ ຫວຽດນາມ ເຂົ້າໃກ້ກັບຕະຫຼາດບັນດາປະເທດຢູ່ ທະວີບ ອາຟຣິກກາ ແລະ ພາກຕາເວັນອອກກາງ. ມູນຄ່າການຄ້າສອງຝ່າຍ ປີ 2018 ບັນລຸໄດ້ 212.7 ລ້ານໂດລາສະຫະລັດ, ໃນນັ້ນ ມູນຄ່າສົ່ງອອກຂອງ ຫວຽດນາມ ບັນລຸໄດ້ 200 ລ້ານໂດລາສະຫະລັດ.
Không có nhận xét nào:
Đăng nhận xét